MADAKTARI, WAUGUZI WAMETAKIWA KUTOA HUDUMA BORA KUPUNGUZA VIFO VYA MAMA NA MTOTO MASASI DC

Posted on: August 20th, 2020

Wakuu wa vituo vya kutolea huduma za afya Halashauri ya Wilaya ya Masasi Mkoani Mtwara, wametakiwa  kutoa huduma bora kwa kuzingatia maadili ya taaluma zao  ili kupunguza vifo mama na mtoto vinavyotokea wakati wa kujifungua.

Agizo hili limetolewa leo na Mkurugenzi Mtendaji wa Halmashauri hiyo Bibi Changwa Mkwazu wakati wa kufungua kikao kazi  kwa watumishi hao  kilicholenga kufanya tathmini ya mpango kazi wa utoaji huduma katika vituo vyote vya kutolea huduma za afya  kila mwezi  na kutatua changamoto mbalimbali zilizojitokeza ili kuboresha utoaji wa huduma hizo.

Mkurugenzi  Mkwazu amewaeleze wakuu wa vituo  hao kuwa, kwa mjibu wa taarifa ya Mkoa   hali ya utoaji wa huduma,  imeonesha kuwa  kwa kipindi  cha miezi mitatu vifo 9 vya wajawazito  wakati wa kujifungua na  vifo 73 vya watoto  chini ya  miaka mitano  vimeripotiwa kutokea katika halmashauri  hiyo na kusababisha halmashauri kushika namba moja kati ya halmashauri 9 za mkoa huo.

Mkwazu  amesema kuwa “inaumiza sana kumpoteza mama au na mtoto wakati wa kujifungua wakati tungeweza kuzuia baadhi ya vifo  hivyo kwa kutoa rufaa mapema , kutoa elimu ya uzazi salama na mengine mengi,  hivyo , hizi takwimu za vifo sio nzuri hata kidogo, tekelezeni wajibu wenu ipasavyo”  

Aidha Mkurugenzi amewakumbusha wakuu wa vituo hao, kutoa elimu ya Uzazi salama kwa wajawazito ikiwemo umuhimu wa kuhudhuria kliniki, kula mlo kamili (lishe)  pamoja na kuwapima vipimo stahiki ikiwemo kipimo cha uwingi wa damu ili kupunguza vifo vinavyosababishwa na masuala hayo.

Pia Mkwazu amesema “Nawaagiza wakuu wa vituo vyote vya kutolea huduma  za afya  ambavyo havina mashine ya kupima uwingi wa Damu  vinunue haraka iwezekanavyo  kwani kuna vifo vingine vinasababishwa na mama mjamzito kutokuwa na damu ya kutosha wakati wa kujifungua”

Kwa upande wake Kaimu Mganga Mkuu wa Halmashauri hiyo Bibi Miriam Cheche  amesema kuwa, kwa mujibu wa ripoti ya mkoa, Halmashauri ya Wilaya ya Masasi imeongoza kuwa na vifo vingi  vya mama na mtoto  ambapo vifo 8 kati ya 9 vilitokea Hospitali ya Rufaa Ndanda na kati ya watoto 73 walifariki, vifo 33 vilitokea kituo cha afya Nagaga

Kaimu Mganga Mkuu wa Halmashauri hiyo Bibi Miriam Cheche akitoa maelekezo kwa wakuu wa vituo vya kutolea huduma leo  tarehe 20.08.2020 kwenye kikao kazi cha tadhimini ya utoaji huduma kwa miezi mitatu iliyopita

Cheche ameeleza kuwa “sababu kubwa iliyopeleka Hospitali ya  Rufaa ndanda na kituo cha Afya Nagaga kuwa na vifo vingi ni kutokana na kuhudumia watu kutoka maeneo mbalimbali ya ndani na nje ya Halmashauri lakini tutajitahidi kuongeza umakini na ubora katika kutoa huduma zetu  kwa wagonjwa hasa wajawazito “

Aidha Kaimu Mganga Mkuu huyo amewasisitiza wakuu wa vituo vya kutolea huduma za afya kutoa rufaa ya kwenda hospitali kubwa kwa haraka pale mama mjamzito anapokuwa na changamoto ya kujifungua kwenye kituo chake.