WAZAZI WASHINIKIZA WATOTO WAO KUFELI MITIHANI YA KUMALIZA ELIMU YA MSINGI

Posted on: June 1st, 2017

Baadhi ya Wazazi na walezi  wa kijiji cha Nantona, kata ya lipumbumbulu katika mamlaka ya  Halmashauri ya Wilaya ya Masasi wanadaiwa kuwashinikiza watoto wao  kufanya vibaya mitihani yao kumaliza elimu ya msingi ili wasichaguliwe kujiunga na kidato cha kwanza  kwa kisingizio cha kuwa hawana fedha za kuwasomesha.

Hayo yalisemwa na wanafunzi wa darasa la saba katika shule ya msingi Nantona wakati walipotembelewa na timu ya menejimenti ya Halmashauri ya Wilaya ya Masasi waliotembelea shule hiyo kwa ajili ya kuongea na wanafunzi hao changamoto zinazowakwamisha kimasomo na kuzitatua  na hatimaye waweze kufaulu mitihani yao ya kumaliza elimu ya msingi na kujiunga na elimu ya sekondari.

Wanafunzi hao walisema kuwa pamoja na kutamani kufaulu vizuri  mitihani yao wamekuwa wakikatishwa tamaa na wazazi au walezi wao kwa kuwaambia wajaze majibu ya uongo kwenye mitihani ili wafeli kwa kuwa hawana fedha za kuwapeleka sekondari,  

Aidha wanafunzi hao walieleza kuwa pamoja na changamoto nyingi wanazokumbana nazo za kukosa muda wa kujisomea, ukosefu wa umeme lakini pia watoto wakike wanakumbana na changamoto ya kushinikizwa kuolewa mara baada ya kumaliza shule badala ya kuendelea na elimu ya sekondari.

Kwa upande wake mwalimu mkuu wa shule hiyo ndugu Beatus Jerome Mwakabilile alisema kuwa wazazina walezi wamekuwa chanzo kikubwa cha wanafunzi wa darasa la saba kutofanya vizuri mitihani ya kumaliza elimu ya msingi kwa kuwatishia kuwapiga, kuwafukuza nyumbani na wengine kuwachinja.

Kutokana na changamoto hizo, Halmashauri pamoja na kuwapa ushauri lakini imeahidi kuwapa kipaumbele watoto watakaofaulu shule hiyo kwa kuwapeleka shule za bweni lakini pia kugharamia mahitaji ya kwenda sekondari ili kuwapa hamasa wanafunzi wa madarasa ya chini.