WATUMISHI WAPYA WA AFYA WASISITIZWA KUTOA HUDUMA BORA

Posted on: August 27th, 2018

Watumishi wapya  31 wa Idara ya afya Halmashauri ya Wilaya ya Masasi wamesisitizwa   kutambua wajibu wao wa kuwahudumia wananchi vizuri kwani ndio lengo la serikali  kuhakikisha wananchi wote wakiwemo wa vijijini wanapata huduma nzuri za afya katika maeneo yao kwa kuwaleta watumishi kwenye vituo vya kutolea huduma za afya.

Watumishi wapya na wawezeshaji wakimsikiliza mgeni Rasmi wakati wa ufunguzi (hayupo kwenye picha)

Msisitizo huo umetolewa leo na Mkurugenzi Mtendaji wa Halmashauri ya Wilaya ya Masasi Changwa Mkwazu wakati akifungua semina elekezi kwa watumishi hao iliyolenga kuwajengea uwezo wa masuala mabalimbali ya utumishi wa umma pamoja na wajibu wao mkubwa katika kuboresha utoaji wa huduma za afya kwa wananchi.

Watumishi wapya wakisikiliza kwa makini maelekezo wakati wa mafunzo elekezi katika utumishi wa umma yaliytolewa na wataamu wa Halmashauri ya Wilaya ya Masasi

Mkwazu ameeleza kuwa Halmashauri inaupungufu wa watumishi wa kada mbalimbali ikiwemo afya, hivyo watumishi hao wapya watasaidia kupunguza tatizo la upungufu wa watumishi katika vituo vya kutolea huduma hali ambayo itapelekea kuboresha utoaji wa huduma kwa wananchi kwani wataalamu wapo kwa kiasi Fulani.

“Vituo vyetu sasa vimepata wataalamu tuliokua tunawategemea, hivyo nategemea mabadiliko makubwa ya utoaji wa huduma  unaozingatia maadili na taratibu za uuguzi kwa timu hii ya watu 31” alisema Mkwazu

Watumishi wapya wakifuatilia maelekezo

Mchango wenu unahitajika katika  kuhakikisha wananchi hawalalamiki kwa kutokuhudumiwa vizuri kwani hali hiyo inasababisha wananchi kuvichukia vituo vya serikali na hatimaye kuamua kutumia dawa za kienyeji ambazo sio salama lakini pia sio lengo la serikali, alisisitiza Mkwazu.

Mwenyekiti wa Halmashauri ya Wilaya ya Masasi Mheshimiwa Juma Satmah akitoa neno kwa watumishi wapya wakati wa  semina elekezi (hawako pichani)

Mkwazu aliwaeleza kuwa “kazi ya kuhudumia afya za watu ni nyeti sana hivyo mnatakiwa kufanya kazi hii kwa moyo na kujitolea sana, wapokeeni vizuri nakuwa na lugha nzuri kwani ugonjwa hauna muda, mtu anaweza kuumwa muda wowote na lazima apate huduma, msichoke”