WATUMISHI WA AFYA WAMEKUMBUSHWA KUFANYA KAZI KWA WEREDI ILI KUPUNGUZA VIFO VITOKANAVYO NA UZAZI

Posted on: July 12th, 2017

Naibu Waziri wa Afya, Dk. Hamisi Kigwangalla  amewataka watumishi wa idara afya  katika vituo vya kutolea huduma za afya kufanya kazi kwa weredi mkubwa ili kupunguza vifo vya akina mama na watoto kabla na baada ya kujifungua kwa kuhakikisha zile sababu zinazopelekea  vifo zinazuilika.

Dk kigwangalla ameyasema hayo akiwa kwenye ziara ya kutembelea vituo vya afya na zahanati  katika Halamshauri ya Wilaya ya Masasi katika kituo cha Nagaga alipotembelea kituo hicho na kujionea vifaa tiba, vitendanishi na miundombinu ya kituo hicho na kueleza kuwa madaktari wana nafasi kubwa ya kupunguza vifo vya akina mama vinavyotokana na  uzazi kwa kuhakikisha wanapatiwa huduma bora kwa mujibu wa sheria na taratibu.

Dk kigwangalla ameeleza kuwa azima ya serikali ni kupunguza vifo vya akina mama vinavyosababishwa kwa  madaktari kutumia weredi wao ipasavyo katika kuwahudumia wamama wajawazito kabla na baada ya kufungua ikiwa ni pamoja na kuhakikisha hawapati magonjwa ya kuambukizwa wakati wa kujifungua.

Akiwa kwenye kituo cha Nagaga Dk kigwangalla amemwagiza Mkurugenzi Mtendaji  wa halmashauri hiyo bi Changwa M Mkwazu  kuhakikisha anajenga chumba cha Upasuaji mdogo  katika kituo cha Nagaga ili kusaidia kutatua matatizo madogomadogo ya upasuaji kwa wagonjwa watakaofikishwa hapo.

Pamoja na agizo la kujenga chumba cha maabara katika kituo cha afya Nagaga amesikitishwa na uwepo mashine ya kuhifadhi damu ambayo haijafanya kazi tangu ilipoletwa na wafadhili kutokana na ubovu wake  kwani hazileti tija ya kutoa huduma bora

 Kiutaratibu kila kituo cha afya kinapaswa kuwa na chumba cha upasuaji kikiwa na vifaa mbalimbali ikiwemo mashine za kutunzia damu ili mgonjwa anayehitaji damu baada ya upasuaji aweze kupata bila shida hivyo kutofanya kazi kwa vifaa hivyo kungesababisha vifo kwa wagonjwa ambao wanahitaji kuongezwa damu baada ya kufanyiwa upasuaji.

Katika ziara hiyo, Dk. Kigwangalla  akiwa katika Zahanati ya lulindi, aliweza kukagua maeneo mbalimbali  na kuwapongeza watumishi wa kituo hicho kwa kuweka mazingara safi pamoja na kutoa huduma bora kwa wananchi wa kijiji hicho hali inayowafanya wananchi wa kawaida  kufurahia huduma.