TAARIFA YA UCHUNGUZI WA VURUGU SHULE YA SEKONDARI CHIDYA WAKAMILIKA,BODI YATOA MAAMUZI

Posted on: September 29th, 2018

Baada ya uchunguzi kufanyika juu ya vurugu zilizofanywa na wanafunzi wa  shule ya sekondari chidya tarehe 1 septemba 2018 na kusababisha hasara ya zaidi ya milioni 18, Bodi ya shule ya sekondari chidya imefikia maamuzi ya kufukuza wanafunzi 23 huku wanafunzi 8 wakisimamishwa shule kwa muda wa siku 21.

Maamuzi hayo yametolewa tarehe 27 septemba, 2018 baada ya kupitia taarifa za uchunguzi  wa tukio hilo na kujiridhisha pasipo na shaka yoyote kuwa wanafunzi hao wanastahili adhabu hiyo kwani wamekutwa na hatia. Aidha taarifa ya bodi imeeleza kuwa hatua hiyo inalenga kukomesha tabia za migomo shuleni hapo na kutoa fundisho kwa wanafunzi waliobaki.

Afisa elimu sekondari wa Halmashauri ya Wilaya ya Masasi  ambaye pia ni mjumbe wa bodi ya shule ya sekondari ya Chidya ndugu Juma Kasandiko,  ameeleza kuwa  sababu kuu zilizofanya wanafunzi  23 waliofukuzwa  shule ni majina yao kutajwa na vyombo zaidi ya vitatu vya uchunguzi, kutoka nje ya shule baada ya kufanya vulugu na kutorejea  jambo ambalo ni kinyume na sheria za shule.

Kasandiko amefafanua kuwa  wanafunzi 23  waliofukuzwa shule kati yao 6 ni kidato cha sita, 12 ni kadato cha nne na 5 kidato cha tatu.

Kwa wanafunzi wa kidato cha nne ambao wamefukuzwa shule, bodi imewapa fursa ya kurudi  kufanya mitihani yao ya kumaliza elimu ya kidato cha nne kwasababu wameshasajiliwa kufanya mtihani huo.

Kuhusu fidia ya hasara iliyosababishwa na vurugu hizo, ndugu Kasandiko ameeleza kuwa italipwa na wananfunzi wote walioshiriki mgomo yaani wanafunzi 23 waliofukuzwa shule, wanafunzi 8 waliosimamishwa shule kwa siku 21 na wanafunzi  251 walioshiriki kwenye vurugu lakini  hawakuondoka shuleni  baada ya vulugu  na hawakutajwa mara nyingi kwenye ripoti za uchunguzi kama vinara wa vurugu hizo ambapo kila mwanafunzi atatakiwa kulipa shilingi 64,000.

“Hatua hizi za kinidhamu kwa wanafunzi wa shule ya sekondari Chidya waliofanya vurugu  na kusabaisha hasara na utulivu wa shule, ni fundisho kwa wanafunzi wanaobaki na shule zingine zote kwani sheria zitaendelea kuchukuliwa kwa wanafunzi wote wanafanya vurugu shuleni ikiwemo kufukuzwa shule” alisistiza Kasandiko.

Aidha ndugu Kasandiko amewasistiza walimu kuwa “ni vizuri mkasimamia sheria za shule kwa kujiwekea utaratibu wa kusikiliza malalamiko ya wanafunzi ili kubaini haraka matatizo ya wanafunzi na kuyatatua, pia kwa walimu wanaoshirikiana na wanafunzi kuhamasisha migomo tabia hiyo muache kabisa kwani sitasita kuwachukulia hatua za kinidhamu. Mfanye  kazi kwa kuzingatia sheria na miongozo ikiwemo kuwa walezi na sio kuhamasisha  wanafunzi kufanya vurugu”

Kwa upande wake Mkuu wa Shule hiyo mwalimu Zawadi Mdimbe amezishukuru kamati za uchunguzi  kwa kufanya kazi zao  vizuri  ambapo taarifa zilizowasilishwa zimeiwezesha bodi ya shule kutoa maamuzi bila upendeleo au kumwonea mtu yeyote na hatimaye sasa shule itakuwa na utulivu  na amani na kuendelea kutekeleza majukumu ya kila siku ikiwemo maandalizi ya mitihani ya kitaifa.