MWENGE WA UHURU WAWASILI MKOANI MTWARA LEO JUNI 11,2018

Posted on: June 11th, 2018

Mwenge wa Uhuru umepokelewa leo Juni  11, 2018  Mkoa wa Mtwara  katika kijiji cha Lumesule wilayani Nanyumbu ukitokea Wilaya ya Tunduru mkoani Ruvuma ambapo utakimbizwa katika Wilaya 5 zenye Halmashauri 9, Mwenge  huo wa Uhuru ukiwa Mtwara  utakimbizwa kwa urefu wa kilomita 943 na kupitia miradi yenye thamani ya shilingi bilioni 29,571,290,632.

Timu ya Mkoa wa Mtwara wakiongozwa na Mkuu wa Mkoa wa Mtwara mhe Gerasius Byakanwa ( wa tano kutoka kushoto) wakiwa tayari kupokea Mwenge wa Uhuru katika kijiji cha Lumesule wilaya ya Nanyumbu leo tarehe 11 Juni, 2018

Akisoma taarifa ya mapokezi ya Mwenge  wa Uhuru  mbele ya kiongozi wa mbio za Mwenge Uhuru  kitaifa ndugu Charle Francis Kabeho Mkuu wa mkoa wa mtwara Mhe. Gerasius Byakanwa alifafanua kuwa katika miradi hiyo ya maendeleo itakayopitiwa na Mwenge wa Uhuru kwa mwaka 2018 , wananchi wamechangia shilingi  594,290,632 , Halmashauri 2,283,201,433 ,Serikali Kuu 18,299,199,929  na Wahisani 8,399,827,800.

Mkuu wa Mkoa wa Mtwara mhe Gerasius Byakanwa akikabidhi mwenye wa uhuru kwa mkuu wa wilaya ya Nanyumbu tayari kwa kuanza kuukimbiza

Pia Byakanwa amesema  kuwa Mwenge wa Uhuru ukiwa mkoani Mtwara utapitia miradi 76 ya maendeleo ambapo miradi  28, itawekewa mawe ya msingi, miradi 11 itazinduliwa ,10 itafunguliwa na 27 itaonwa na kukaguliwa.

Mkuu wa Mkoa wa Mtwara mhe Gerasius Byakanwa  akisoma taarifa ya mapokezi ya mwenge wa Uhuru mbele ya kiongozi wa mbio za mwenge kitaifa ndugu Charle Francis Kabeho (aliyevaa skafu)

Byakanwa ameeleza kuwa ,  “ni matarajio yangu kuwa mbio za mwenge wa uhuru kwa mwaka 2018 zitahamasisha wananchi  kuwekeza katika elimu  kama  ujumbe na kaulimbiu ya Mwenge wa Uhuru wa mwaka  huu 2018 unaosema, Uwekezaji katika elimu, elimu ni ufunguo wa maisha, wekeza sasa kwa maendeleo ya taifa letu”  kwani maendeleo katika sekta ya elimu yatafanikiwa ikiwa wananchi wataelewa na kuwekeza katika miundombinu na chakula kwa wanafunzi badala ya kuiachia serikali pekee.

Baada ya  kupokelewa Mwenge wa Uhuru  kimkoa, umeanza kukimbizwa katika Wilaya ya Nanyumbu. ambapo Halmashauri ya Wilaya ya Masasi utakimbizwa tarehe 13 Juni 2018