KAMILISHENI MRADI IFIKAPO MAY 30,2024

Posted on: May 9th, 2024

Kamati ya Fedha Halmashauri ya Wilaya Masasi Mkoani Mtwara tarehe 06/05/2024  imefanya ziara ya kutembelea na  kukagua miradi mbalimbali ya Maendeleo ambayo inatekelezwa ndani ya Halmashauri hiyo.

Kamati hiyo ikiwa Katika Jimbo la Lulindi imekagua ujenzi wa matundu 23 ya vyoo Katika Shule ya Msingi Ng'uni iliyopo katika Kata ya Sindano, ikiwa ni mradi wa  SWASH unaogharimu kiasi Cha Fedha shilingi 51,858,872.00.

Mradi huo ambao kwasasa upo katika hatua ya umaliziaji kwa  kufunga mfumo wa Maji, Kupaka rangi, Kupachika Milango, kuweka Tiles, kutengeneza Eneo la kunawia mikono kwa Wanafunzi, Waalimu,na wafanyakazi wengine, Kutengeneza rapu Pamoja na ngazi, inaelezwa kuwa utakapokamilika utaboresha sana  Afya za Wanafunzi, Utajenga hali ya kujiamini kwa Wanafunzi hasa wa kike waliopo kwenye Makuzi na kupunguza utoro.

Kwaupande wake Mwenyekiti wa Halmashauri ya Wilaya Masasi Ndug.Ibrahimu Chiputula ameutaka uongozi wa Shule na kamati inayosimamia ujenzi huo kuhakikisha unajengwa kwa viwango vinavyotakiwa na uwe wa mfano  kulingana na thamani ya  fedha zilizotolewa na pia ifikapo tarehe 30/05/2024 mradi huo uwe umekamilka.