KABEHO AZIPONGEZA WILAYA ZA MTWARA ZILIZOFANYA VIZURI MBIO ZA MWENGE WA UHURU 2018

Posted on: June 20th, 2018

Kiongozi wa mbio za Mwenge wa Uhuru kitaifa ndugu Charles Francis Kabeho amezipongeza Wilaya za Mkoa wa Mtwara zilizofanya vizuri katika mbio za mwenge wa uhuru  2018 zilizoanza tarehe  11  juni  na kumalizika tarehe 19 juni 2018 ambapo amesema kuwa baadhi ya wilaya zilikuwa na miradi mizuri ambayo mwenge wa uhuru uliweza kupitia bila matatizo.

Mkuu wa Mkoa wa Mtwara mhe Gelasius Byakanwa (mwenye shati la kitenge) akimkabidhi Mwenge wa Uhuru Mkuu wa Mkoa wa Lindi mhe Godfrey Zambi leo tarehe 20.06.2018 katika viwanja vya shule ya msingi Madangwa

Kabeho ametoa pongezi hizo leo wakati wa  makabidhiano ya  mwenge wa uhuru kati ya mkoa wa mtwara na lindi yaliyofanyika katika viwanja vya Shule ya  Msingi Madangwa mkoani Lindi na kueleza kuwa wakati wa ukaguzi wa miradi kuna baadhi ya wilaya zimefanya vizuri sana kwa kuwa na miradi mizuri iliyozingatia thamani ya fedha na ubora unaotakiwa hivyo zinastahili pongezi.

Mkuu wa Mkoa wa Mtwara mhe Gelasius Byakanwa (aliyeshika mike) akifurahia jambo wakati kukabidhi  Mwenge wa Uhuru  Mkoa wa Lindi  leo tarehe 20.06.2018 katika viwanja vya shule ya msingi Madangwa

Aidha,  Kabeho ameeleza kuwa, kwa wilaya ambazo miradi yake imekutwa na dosari nazo nazipongeza kwa kazi walizofanya na kutokana na dosari hizo wanaweza  kurekebisha  na kujifunza namna bora ya kusimamia miradi  ya maendeleo kwa kuzingatia viwango stahiki.

Akisoma taarifa ya  Mkoa wakati wa makabidhiano ya Mwenge wa Uhuru mbele ya kiongozi wa mbio za Mwenge wa uhuru kitaifa ndugu Charles Francis Kabeho, Mkuu wa Mkoa wa Mtwara Mhe. Gelasius Byakanwa amesema kwa upande wa Halmashauri  zilizopatikana na dosari kwenye miradi yao ameunda kamati ya uchunguzi ili kubaini chanzo na mapungufu yaliyojitokeza kwenye miradi hiyo iliyokataliwa na kushauri hatua gani zichuliwe kwa mujibu wa sheria.

Mkuu wa Mkoa wa Mtwara mhe Gelasius Byakanwa (aliyeshika karatasi )  akisoma  taarifa wakati wa kukabidhi Mwenge wa Uhuru Mkoa wa  Lindi  leo tarehe 20.06.2018 katika viwanja vya shule ya msingi Madangwa

Byakanwa amefafanua kuwa mwenge wa uhuru ukiwa Mtwara umepitia miradi 76 katika sekta ya elimu, afya,maji,barabara,utawala bora na maendeleo ya wanawake na vijana ambapo kati ya hiyo miradi 24 imewekewa mawe ya msingi, 10 imefunguliwa, 11 imezinduliwa, 27 imeonwa na kukaguliwa na miradi 4 imekataliwa yenye thamani ya shilingi milioni 634,286,920 sawa na asilimia 2.14 ya gharama za miradi yote shilingi 29,661,235,832.

Watumishi na viongozi wa Mkoa wa Mtwara wakiwa tayari kukabidhi mwenge wa uhuru Mkoa wa Lindi